ඇමරිකාවේ ටෙක්සාස් හී ප්‍රාථමික පාසලක තුවක්කුකරුවෙකු සිදුකළ වෙඩි තැබීමකින් අවම වශයෙන් ළමුන් 19 ක් සහ ගුරුවරුන් දෙදෙනෙකු මියගිය බව ටෙක්සාස් හී මහජන ආරක්ෂාව පිළිබඳ දෙපාර්තමේන්තුව උපුටා දක්වමින් එන්බීසී ප්‍රවෘත්ති වෙබ් අඩවිය වාර්තා කර තිබෙනවා.

සැන් ඇන්ටෝනියෝ නගරයට සැතපුම් 83ක් බටහිර දෙසින් පිහිටි උවාල්ඩේ හී රොබ් නම් ප්‍රාථමික පාසලේ දී එම සිදුවීම සිදු වී ඇති අතර නීතිය ක්‍රියාත්මක කරන නිලධාරීන් ඔහුට මුහුණ දුන් අවස්ථාවේදී වෙඩික්කරු අත අත් තුවක්කුවක් සහ රයිෆලයක් තිබූ බව ඔවුන් පවසනවා. මේ අතර වෙඩික්කරු ද මිය ගොස් ඇති බව ආණ්ඩුකාර ග්‍රෙග් ඇබට් මාධ්‍ය වෙත පවසා තිබෙනවා.

“ඔහු ඔහුගේ වාහනය අතහැර දමා, පසුව අත් තුවක්කුවක් සමඟ උවාල්ඩේ රොබ් ප්‍රාථමික පාසලට ඇතුළු වූ බව විශ්වාස කෙරේ, ඔහු සතුව රයිෆලයක් ද තිබිය හැකියි,” ඇබට් මාධ්‍ය වෙත පැවසීය.

වෙඩි තැබූ සැකකරුට අමතරව ළමුන් 19 දෙනෙකු සහ ගුරුවරුන් දෙදෙනෙකු මිය ගිය බව ටෙක්සාස් මහජන ආරක්ෂාව පිළිබඳ දෙපාර්තමේන්තුව මේ වනවිට අනාවරණය කර තිබේ. දිවි ගලවා ගත් කිහිප දෙනෙකු සිටින අතර නිශ්චිත සංඛ්‍යාව නිකුත් කර නොමැත. ඔවුන් ප්‍රාදේශීය රෝහල්වල ප්‍රතිකාර ලබමින් සිටින බව ද එන්බීසී වාර්තා කර තිබේ.

එය අමෙරිකානු පාසල් පරිශ්‍රයක ළමුන් සහ අධ්‍යාපනඥයින් ඉලක්ක කර ගනිමින් සිදුවූ තවත් මහා වෙඩි තැබීමක් ලෙස මාධ්‍ය වාර්තා කර තිබෙනවා. ඒ එරට එවැනි සිදුවීම් වරින්වර වාර්තා වී තිබීම නිසාය.

ටෙක්සාස් මහජන ආරක්ෂාව පිළිබඳ දෙපාර්තමේන්තුව අනාවරණය කළේ මෙම සිදුවීමට අදාළ සැකකරු 18 හැවිරිදි සැකකරු සැල්වදෝර් රොලැන්ඩෝ රමෝස් ලෙස හඳුනාගෙන ඇති බවයි.

සැකකරු තනිව ක්‍රියාකළ අයෙකු බවට හඳුනාගෙන ඇති අතර සිද්ධියට පෙර තම ආච්චිට වෙඩි තබා ඇතැයි බලධාරීහු පවසති. ඉන් පසු සැකකරු පාසල දෙසට ධාවනය කර ඇති අතර ඒ පාසල ආසන්නයේ දී සැකකරුගේ වාහනය ද අනතුරට ලක්ව තිබිය දී සොයාගෙන ඇතැයි වාර්තා වේ.

“ඔහු තමා ඉදිරිපිට සිටි සෑම පුද්ගලයෙකුටම වෙඩි තැබීමට පටන් ගත්තේය,”

ටෙක්සාස් මහජන ආරක්ෂාව පිළිබඳ දෙපාර්තමේන්තුව පැවසුවේ වෙඩික්කරු ශරීරාක්ෂක කබායක් ද පැළඳ සිටි අතර රයිෆලයක් අතැතිව සිටි බවයි. එරට වේලාවෙන් පෙරවරු 11.30 ට පසුව මෙම සමූහ ජීවිත හානි සිදුවීම වාර්තා වූ බව බලධාරීහු පවසති.

මේ අතර වෙඩික්කරු ඔහුගේ 18 වැනි උපන්දිනයේදී උවල්ඩේ ප්‍රදේශයේ තුවක්කු ගබඩාවකදී අර්ධ ස්වයංක්‍රීය රයිෆල් දෙකක් මිලදී ගත් බව අනාවරණය කරගෙන ඇත. ප්‍රහාරය සඳහා එම ආයුධවලින් එකක් හෝ ඒ දෙක භාවිත කළේද යන්න පැහැදිලි නැති බව ද බලධාරීන් කියයි.

FBI නියෝජිතයන් සහ එක්සත් ජනපද දේශසීමා ආරක්ෂක නිලධාරීන් සැකකරුගේ චේතනාවන් සහ පසුබිම පිළිබඳ විමර්ශනය සඳහා ප්‍රාදේශීය නීතිය බලාත්මක කරන ආයතන වෙත සහාය වෙමින් සිටි බව බලධාරීහු පවසති. මධ්‍යසාර, දුම්කොළ, ගිනි අවි සහ පුපුරණ ද්‍රව්‍ය කාර්යාංශය ද සහාය පැමිණ සිටී.

මැයි 24 අඟහරුවාදා සිදුවූ ප්‍රහාරය 1999 දී කොලරාඩෝ හි ලිට්ල්ටන් හි කොලම්බයින් උසස් පාසලේ මාරාන්තික වෙඩි තැබීම් සිහිපත් කරයි. 2018 දී ෆ්ලොරිඩා හි පාර්ක්ලන්ඩ් හි මාජරි ස්ටෝන්මන් ඩග්ලස් උසස් පාසල; සහ 2018 දී ටෙක්සාස් හි සැන්ටා ෆේ උසස් පාසල තුළ සිදු වූ සිදුවීම් ද සිහිපත් කරන බව මාධ්‍ය පෙන්වා දෙයි.

2012 දෙසැම්බර් 14 වැනි දින කනෙක්ටිකට්, නිව්ටවුන් හි සැන්ඩි හූක් ප්‍රාථමික පාසලේ ප්‍රහාරයෙන් 20 හැවිරිදි පුද්ගලයෙක් ළමයින් 20 ක් සහ වැඩිහිටියන් හය දෙනෙකු මරා දැමූ සිදුවීමක් වාර්තා වී තිබුණි.

– එන්බීසී වාර්තාව ඇසුරින්

කොරෝනා එන්නත් මාත්‍රා අතර කාල විරාමය ඉහළ නැංවීම තුළින් පුද්ගලයෙකු කොරෝනා විකෘති ප්‍රභේදවලට ගොදුරු වීමේ අවදානමක් පවතින බව අමෙරිකාවේ ප්‍රධාන වසංගත රෝග විද්‍යාඥයා වන වෛද්‍ය ඇන්තනී ෆවුචි පවසනවා.

ඔහු මේ බව සඳහන් කර ඇත්තේ ඉන්දීය රජය මගින් කොරෝනා එන්නත් මාත්‍රා අතර පරතරය ඉහළ නැංවීමට ගෙන ඇති තීරණය පිළිබඳව සිදුකළ විමසීමට පිළිතුරු වශයෙන් ය.

වෛද්‍ය ඇන්තනී ෆවුචි සඳහන් කළේ ෆයිසර් සහ මොඩර්නා යන එම්-ආර්.එන්.ඒ. තාක්ෂණයෙන් නිෂ්පාදනය කෙරෙන කොරෝනා එන්නත් මාත්‍රා අතර පරතරය ෆයිසර් එන්නත සඳහා සති 03 ක් ද මොඩර්නා එන්නත සඳහා සති 04 ක් ද විය යුතු බවයි.

කෙසේ නමුත්, සැපයීමේ හිඟයක් පවතින විට එන්නත් මාත්‍රා අතර පරතරය ඉහළ නැංවීම හැර විකල්පයක් නොවන බව ඔහුගේ අදහසයි.

ඔක්ස්ෆර්ඩ් ඇස්ට්‍රාසෙනෙකා කොවිෂීල්ඩ් එන්නතේ මාත්‍රා දෙකක් අතර පරතරය සති 12 ත්, 16 ත් අතර කාලයක් දක්වා ඉහළ නැංවීමට ඉන්දීය රජය පසුගියදා තීරණය කළා.

එලෙස කොවිෂීල්ඩ් එන්නත් අතර පරතරය ඉහළ ප්‍රතිඵල ලබාගැනීම සඳහා දීර්ඝ කළ දෙවන අවස්ථාව එයයි.

ඊට පෙර එම එන්නත් මාත්‍රා අතර පරතරය දින විසි අටේ සිට සති 06 ක් හෝ 08 ක් දක්වා ඉහළ නැංවිය හැකි බව ඉන්දීය සෞඛ්‍ය බලධාරීන් ප්‍රකාශ කළේ. ඒ, කොරෝනා එන්නත් සැපයුමේ විශාල හිඟයක් පැවතීම හේතුවෙන් ය.

විශේෂයෙන්ම, ඉන්දියාවෙන් වාර්තා වූ ‘ඩෙල්ටා’ කොවිඩ් ප්‍රභේදය මර්දනය සඳහා එන්නත්කරණ වැඩපිළිවෙල වේගවත්ව සිදු විය යුතු බව ද වෛද්‍ය ඇන්තනී ෆවුචි සඳහන් කරයි.

කොරෝනා වසංගතයෙන් මේ වන විට දැඩි ලෙස පීඩාවට පත්ව සිටින ඉන්දියාවෙන් අපූරු පුවතක් වාර්තා වනවා. ඒ ඉන්දියාවේ‌ කොයිම්බතූර් ප්‍රදේශයේ පිහිටි කෝවිලක ඉදිව ඇති අලුත් දේව රූපයක් පිළිබඳවයි.

ඉන්දියාවේ කොයිම්බතූරු ප්‍රදේශයේ පිහිටි මෙම කෝවිලට ‘කොරෝනා දේවි’ නමින් දේව රූපයක් සාදා ඊට පුද පූජා පැවැත්වීම ආරම්භ කර තිබෙනවා. අඩි 1.5 ක් පමණ උසැති මෙම පිළිරුවට දිනපතා පුද පූජා පැවැත්වෙන බවයි වාර්තා වන්නේ.

මේ වන විට පවත්නා වසංගත තත්ත්වය හමුවේ පනවා ඇති නීති හේතුවෙන් මහජනතාවට විශේෂ පූජාවන් සඳහා අවසර ලබා දී නොමැති අතර දින 48ක් පුරා මෙම පුජාවන් පැවැත්වීමට සැලසුම් කර ඇති බව ද වාර්තා වේ.

දින 48ක විශේෂ පූජාවන් අවසන් කිරීමෙන් පසුව බැතිමතුන්ට වන්දනා කිරීම සඳහා එම දේවාලය විවෘත කරන බව ද ඉන්දීය පුවත් වාර්තා කරයි.

කොරෝනා වෛරසයෙන් ඉන්දියාව බේරා ගැනීමට මෙලෙස ‘කොරෝනා දේවි’ පිළිරුවක් නිමවා පුද සත්කාර කිරීම සිදු කරන බවයි එම දේවාලයේ පූජකවරයා සඳහන් කරන්නේ.

කෙසේවෙතත්, කොරෝනා වෛරසය හේතුවෙන් පසුගිය සති හතර තුළ පමණක් ඉන්දියාවේ මිය ගොස් ඇති සංඛ්‍යාව 100,000 ඉක්මවා ගොස් තිබෙනවා.