ජනාධිපති ගෝඨාභය රාජපක්ෂ සිය ධූරයෙන් ඉල්ලා අස්වන බව නිල වශයෙන් අග්‍රාමාත්‍ය රනිල් වික්‍රමසිංහ වෙත දැනුම් දුන් බව අග්‍රාමාත්‍ය මාධ්‍ය ඒකකය ජූලි 11 වැනිදා සඳහන් කළා.
දේශපාලන ආරංචි මාර්ග සඳහන් කරන්නේ අග්‍රාමාත්‍යවරයාට ද ධූරයෙන් ඉවත් වන ලෙස ජනාධිපතිවරයා ඉල්ලා ඇති බවයි. කෙසේ නමුත් ඒ සම්බන්ධයෙන් තහවුරු කිරීමක් සිදුකිරීමට අග්‍රාමාත්‍ය මාධ්‍ය ඒකකය කටයුතු කර නැත.
මෙරට ආණ්ඩුක්‍රම ව්‍යවස්ථාව අනුව, ජනාධිපතිවරයා ධූරයෙන් ඉල්ලා අස්විය යුත්තේ කතානායකවරයා අමතා යවන ලිපියකිනි. මේ වනවිට ජනාධිපති ගෝඨාභය රාජපක්ෂ කතානායකවරයා වෙත දැනුම් දී ඇත්තේ තමා ජූලි 13 වැනිදා අදාළ ඉල්ලා අස්වීම ලබා දෙන බවයි.
